(1949) Consulta al Dotor Julián por les fiestes de San Xuan
Consulta al Dotor Julián por les fiestes de San Xuan
Ye Xuanón d'Entrerríos un paisano
que llabor non taraza , ni a so mano,
y aparte de abondes perres y tarrones,
ye empresariu en negociu de carbones.
Siempre fama de fartón tuvo esti home
porque más que una vaca él solu come
y la muyer y los fios, los probinos,
de fame van de llombu nos caminos.
Trabayar como burros fay a todos
pa él hinchase de tragar y de acomodos
y les fabes y el maiz, que abondo i sobra,
l'extraperlu (y perdonailu) ye'l que obra.
Bien sabio: si a un pollin, como a persona,
el focicu non se i unta con borona
durará un mes, un veranu y un inviernu
Esto mesmo ya pasaba a muyer y fios
de Xuanón, el usureru, d'Entrerríos
que de fame se cayíen por les caleyes
y el treslluz ya se yos via en les oreyes.
Afrentau por to el pueblu esti Xuanón
ayer mesmo los baxó en procesión
que don Julián los viera y rexistrara
pa cambiayos el color de la so cara.
Diz, Xuanón: Señor médicu; quisiera,
anque un duru pol rexistru yo a usté i diera,
y el porqué tos se queden tan delgaos.
Cuel el dotor l'aparatu nes oreyes:
escucha aquí, palpa allí, mira les oreyes
y dispués de cerciorau y bien seguru
diz a Xuanón:
-¿Quiés sacalos d'esti apuru?...
-¡Home, si, don Julián, eso quisiera!
y qu'esta ruindá d'ellos se fuera.
-Pues si quiés velos rollizos y la cara colorá,
a cambiu del trabayu y de comer cuayá
y debura filtrá, que, ye lo que sorben,
dayos fabes con llacón, verás si engorden.